Stortinget vedtok i 1920 at det skulle settast i drift ein forsøksstasjon for landbruket i Troms og Finnmark. I 1923 kjøpte Staten garden Holt på Tromsøya, og den fekk namnet Statens forsøksstasjon i plantekultur for Troms og Finnmark. I dag har stasjonen ei forsøksavdeling på Flaten i Alta og disponerer eit areal i Malangen. Universitetet i Tromsø driv det biologiske klimalaboratoriet på Holt i samarbeid med forskingsstasjonen. I tillegg har Universitetet ei avdeling for arktisk biologi på Holt. Forskings- og forsøksverksemda på SFL Holt har i stor grad vore retta mot problemstillingar som er knytta til landsdelens særlege behov, men stasjonen samarbeider også i eit omfattande forskingsnettverk. Analyselaboratoriet ved SFL Holt er i dag sentralt laboratorium for Statens forskingsstasjonar i landbruk og har som hovudoppgåve å utføre kjemiske analysar av jord, planter og vatn i samband med forskinga som blir utført på institusjonen. Det er også eit regionalt laboratorium som utfører kjemiske analysar av vatn, avløp, jord og fôr. Holt forskingsstasjon var ein sjølvstendig forskingsstasjon med forsøksleiar fram til 1975, då ei omorganisering førte til at alle forskingsstasjonane i landbruk blei samla i ein eigen etat (Statens forskingsstasjonar i landbruk, SFL). Frå 1977 har hovedadministrasjonen vore plassert på Ås, og dei tilsette på kvar enkelt stasjon valte styrar og styre. I 1.1.1992 blei organiseringa i SFL lagt om på nytt. Stasjonsleiinga er nå kombinert med stillinga som forskingssjef. Ansvar for dei ulike forskingsområda er fordelt på fire stillingar for heile landet. Forskingssjefen på Holt har nå mellom anna ansvaret for all forsking innan planteforedling som foregår i Statens forskingsstasjonar i landbruk.