Hosanger vart eigen heradskommune frå 1838 i samsvar med formannskapslovene av 1837. Ved kommunesamanslåinga i 1964 vart kommunen delt mellom kommunane Osterøy og Lindås. Hosanger heradskommune låg på nord- og sørsida av Osterfjorden. Den sørlegaste delen av kommunen låg på Osterøya. Før kommunesamanslåinga i 1964 grensa kommunen i nord til Masfjorden, i nordaust til Modalen, i aust til Bruvik, i sør til Haus og i vest til Hamre kommune. Kommuneinndelinga: I samsvar med formannskapslovene av 1837 § 1 vart Hosanger formannskapsdistrikt oppretta og gjort gjeldande frå 1838. " I ethvert Præstegjeld paa Landet skal det være et Formandskab....." Matrikkellova av 1863 innførte nemninga herad for formannskapsdistrikt på landet. Heradskommune er også ei nemning som er brukt. I nyare tid er kommune den mest vanlege nemninga. Då Alversund prestegjeld ved kgl.res. av 22.11.1884 vart oppretta, vart det i same resolusjonen gjort vedtak om at prestegjeldet vart eigen heradskommune. Seim sokn i Hosanger prestegjeld gjekk inn i den nye Alversund heradskommune. Ved kgl.res. av 17.11.1909 vart soknene Mo og Eksingedalen frådelt Hosanger heradskommune, og vart eigen heradskommune med namnet Modalen. " Ved kongelig resolution av 17de november 1909 er det bestemt: 1. At Hosanger herred i Søndre Bergenhus amt fra den tid, som av amtmanden bestemmes, paa de av herredstyret i møte den 5te oktober og 7de november 1908 samt 15de februar 1909 vedtagne vilkaar deles i to herreder, nemlig Hosanger herred, svarende til Hosanger sogn, og Modalen herred, svarende til Mo og Eksingedalen sogne. 2. At der i henhold til landsformandskabslovens § 63 meddeles amtmanden bemyndigelse til at la avholde ekstraordinære kommunevalg for de nye herreder til utkaarelse av det fornødne antal representanter med suppleanter i henhold til nævnte loves § 1 med funktionstid indtil udgangen av aaret 1910, samt at valgstyrene bemyndiges til at fastsette de ændringer med hensyn til formandskapslovers frister vedrørende valg, som maatte findes fornødne. " Vedtaket vart gjort gjeldande frå 1. januar 1910. Ved kgl.res. av 17.10.1930 vart Kvamme gnr. 19 bnr. 1-5 og 7-8 overført frå Lindås heradskommune til Hosanger heradskomune. Gjeldande frå 1964 skjedde det store endringar i kommuneinndelinga i Hordaland fylke, til liks med resten av landet. Ved kgl.res. 07.09.1962 vart det gjort vedtak om desse endringane for Hosanger heradskommune: "Kgl.res. av 07.09.1962 om at det skal gjerast fylgjande endringar i kommuneinndelinga i Hordaland fylke: (......) 2) Alversund kommune, Lindås kommune (med unntak av Sletta krins og gardane Einestrand, Eikebotn og Kikallen), Hamre og Hosanger kommunar sine område nord for Osterfjorden, Titland krins av Sæbø kommune og eigedomane under gnr, 70 - Nipo, gnr. 71 - Dyrkolbotn og gnr. 72 - Eitrdalen av Modalen kommune skal skipa ein heradskommune. " 3) Dei områda av Hamre, Hosanger og Haus kommunar som ligg på Osterøya skal skipa ein heradskommune saman med det området av Bruvik kommune på Osterøya som ligg sør for Hesjedal krins (eigedomane under gnr. 1 - 11 i Bruvik)." Kgl.res. av 21.06.1963 fastsette at ovanståande resolusjon skulle gjerast gjeldande frå 01.01.1964. Ved kgl.res. av 09.08.1963 vart det gjort fylgjande vedtak: " I medhald av mellombels lov av 21.juni 1956 om revisjon av komuneinndelinga vart fastsett: (...) 2) Den nye heradskommunen på Osterøya, skipa ved samanslåing av delar av Haus, Hamre, Hosanger og Bruvik kommunar, får namnet O s t e r ø y. 3) Den nye heradskommunen på Lindåshalvøya, skipa av kommunane Lindås (unnateke Sletta krins og gardane Einestrand, Eikebotn og Kikallen) og Alversund og delar av Hamre, Hosanger, Modalen og Sæbø kommunar, får namnet L i n d å s.